Geerida Abwaan Maxamed Ibraahim Warsame "Hadraawi", oo maanta ku dhintay magaalada Hatgeysa ayaa si wayn u gilgishay Soomaalida iyo dadkii kale ee aqoonta u lahaa ama magaciisa garanayay.
Qof walba wax buu ku xasuustaa abwaanka oo magac wayn ku leh fanka Soomaalida iyo taariikhda waddanka.
Suugaantiisa oo uu wax walba ku cabiray waxa uu sidoo kale uga hadlay dhinaca diinteenna Islaamka.
Buuggiisa caanka ah ee "Hawaale Warran" oo uu umadda Soomaaliyeed u hibeeyay ayuu ku sharraxay muhiimadda diinta.
"Si badbaado loo helo, diinta Islaamku waa qalabka Ilaahay ugu talagalay in lagu dhaqmo," ayuu ku yiri qormada buuggaas.
Waxa uu sidoo kale sheegay in Culumadu ay tahay hoggaanka shacabka ku haga raacista diinta.
Taas marka laga soo tago, si toos ah ayuu uga hadlay aakhiro, oo ah meesha aan dhammaanteen u wada soconno.
Silsiladda Siinleey
Waxaa laga yaabaa in aad maqashay silsiladda caanka ah ee ‘Siinleyda’ ee ka billaabatay heesta Saxarla ee uu tiriyay abwaan Hadraawi.
Waxaa jiray labo maanso/hees oo ay horay isu waydaarsadeen isaga iyo abwaan Cabdi Aadan Xaad (Cabdi Qeys), kuwaas oo kala ahaa: ‘Aakhiroy xaggee baad naga xigtaa?’ iyo ‘Araxmaan’.
Maalinta xanuunkiyo
Xaqa mowdku soo galo
Xabaasha iyo iilkaan
Kugu soo xusuustaa
Xiddigaha cirkee sare
In aad xubin ka mida tahay
In aad hoos u xulan tahay
Dhulka xero ku leedahay
Maanu helin xogtaadee
Aakhiroy xaggee baad naga xigtaa?
Jawaabta Hadraawi
Abwaan Hadraawi ayaa ka jawaabay su'aasha uu abwaan Qays ku sheegay tixdiisa ee ah "Aakhiroy xaggee baad naga xigtaa?".
Waxa uu aakhiro ku sifeeyay tix kale oo aad cajiib u ah, ilaa haddana xiisaheedu uu jiro. Waa tixda loo yaqaanno "Araxmaan".
Aayadaha Qur’aankiyo Al-Raxmaan siday tidhi
Aayadaha Ilaahay, ruuxii islaam ah sida uu aqoonsaday
Waa oomman hawdoo, waa guri abeesoo
Edeg weeye hoosoo, abataqa ku yaalloo, waa iil madooboo
Rabbigay addoomaha kaga aargutaayoo
Waxa laga arooraa irridaha xabaashoo,
amban maayo ruuxii qabri lagu adkeeyaa
marna oogadeenniyo waa oosha guudkoo,
waa beer udgooniyo duni wada ilaysoo
Waa ceel irmaaniyo togag wada ordaayoo
Ilo wada xareedoo lagu oon baxaayoo
Naftu eegmo sugashada ashqaraar ka qaaddoo
Toddobaatan ooryood lala aqal galaayoo
Rabbigay addoomaha ku abaal marshaayoo dhibta lagu ilaabaa
Af-hayaha barbaartoow, ababshaha dhallaankoow
Taliyaha abwaankoow, aabbaha jacaylkoow
Adigoon ogayn baan uurkaaga baadhoo
Ula jeedadaadaan ka arkaa dhul dheeroo
Arrinkaagu Qaysoow af gobaadsi weeyaan
Aakhiro Cabdoow way aasan tahay, iilkay jirtaa
Aakhiro Cabdoow ambatoo luntoo, ururkiyo laxaha
Awrkii cikray ku ag xidhan tahee dadku yuu ku eedayn
Ha dhex galin umuuraha, isha xidho afkana dhowr,
Arag maqal warkana ood
Alle ha u naxariisto, Abwaan Hadraawi wuxuu buuggiisa Hawaale Warran horay ugu sheegay in qof kasta uu leeyahay waxa uu shaqeysto.
Wuxuu yiri: "Haddii uu qofku jidka badbaadada raaco, waxa uu ka kasbo isaga ayaa leh. Haddii uu jidka naarta raacana, waxa uu ka kasbo isaga ayaa leh. Labada waddo hadba ka uu qofku raaco ayaa xukuma ficilka qofka iyo abaalmarinta uu helayo."
Xiggasho: BBC